بكاء مباح !!

حزني عليك!
حزني: سلامي وانهزامي في يديك..
بس أنت لا تقطع طريق العودة الكبرى إليك!

***

قال: تبكي!
قلت: وابكي..
وأتهور بالبُكا لين تعفي..
ولين ما يعلن خفوقك لي سلامه..
تحت رجليك الكرامة!!

***

قال: تبكي!
قلت: وابكي..
تدري يعني ويش (وابكي)؟
واو: عطف وحزن وأشياء بشعوري...
تكسر العز بحضوري...
وفعل أبعد ما يكون اسمه: مروّة..
بس بـ (ابكي) لك.. بقوّة..
يمكن تحس (الأخوّة)!

***

قال: تبكي!
قلت: وابكي...
البُـكا لعيون خيّك.. ياوخيّك.. ما يعيب..
كان ما عزّك عليها.. وحطك بقدم الربوع..
لا تخاف من الرجوع..
يا قطوع:
سنبلت عيني دموع..
واطلعت لك (حُب) صافي..
كان قاله رب خلقه: ماتجوع!

***

قال: تبكي!
قلت: وابكي..
والله إني مابكيت إلا عشانك.. مرتين..
مره بشوفة جبينك من سنين:
يوم فقت من المرض بيدي مغذّي..
التفت أعدّل قياسه.. وشفتك..
عالبلاط البارد الموحش تعب..
نايم ٍ نوم متوذّي..
نايم ٍ نومة حزين...
والثانيه: هاللحين!!

***

قال: تبكي!
قلت: وابكي..
ليه مابكي؟
وأنت كل الناس.. يالغالي..
أمي وأبوي.. وعمي وخالي..
وأنت الجمل..
اللي تواسى للثقال..
كل الحمول اللي عجز عن حملها رجّال..
قد شلتها فرد وجموع..
لعيوني لحالي..
وليه مابكي.. وأنت تفديني...
وأنا بعد مثلك فداك...
وإن ما كفيت أورّث عيالي