تميم ريما، ريما تميم

يا تميم..
آخر (الأحلام) نون..
لو تشوف بآخر الأحلام.. ميم!!
علّم عيونك.. تحِسّ!..
بعض الأشيا يا صديقي.. ما تشاف..
تنفهم.. ما تنقرا..
تنعرف.. ما تنسمع..
مثل ريما.. بس تُحَسّ!!

.

.

يا تميم..
آخر (عيونك) مدى..
بس معها (لا نهاياتك) تطول وتستديم!!
ما لآخرها.. أواخر..
وكان تطمح (لا وصولك) يستقيم..
خلك: أول.. وأنت نفس الوقت: آخر!!

.

.

يا تميم..
آخر (الأيام) موت..
بس معها.. ما تموت!!..
كل من سلم عليها لحظة.. بلحظة يُخَلّد!
كل من مر بخيال جنانها لحظة.. يخلّد!!
كل خطوة قاطعت خطواتها - لو صدفة - بصدفة تُخلد!!!

.

.

يا تميم..
آخر (الأوجاع) آه..
بس معها.. كل أوجاعك تصير الـ (مُشتهاه)..
كل (جَرح) يصير طيّب..
كل (بُعد) تحسه أقرب من قريّب..
كل (ميلات الحياة) تكون دايم: مستقيم..
بس معها.. يا تميم!!
بس معها.. يا تميم!!